Beth yw Gwiriad Biwro Cofnodion Troseddol (CRB)?

Fel rhan o'r broses gymeradwyo mae'n ofynnol bod ymgeiswyr yn gwneud cais am Ddatgeliad Manwl gan y Biwro Cofnodion Troseddol (gwiriad CRB). Mae gwiriad CRB yn ddogfen sy'n cynnwys gwybodaeth a ddelir gan yr heddlu a chan adrannau'r llywodraeth a gall cyflogwyr a chyrff gwirfoddol ei defnyddio i wneud gwell penderfyniadau recriwtio. Darperir datganiadau gan y Biwro Cofnodion Troseddol (CRB), un o asiantaethau gweithredol y Swyddfa Gartref.

Mae gwiriad CRB yn angenrheidiol i'r rheiny fydd yn gofalu'n rheolaidd am hyfforddi, goruchwylio neu a fydd yn gyfrifol ar eu pennau eu hunain am blant neu am oedolion bregus ac mae'n cynnwys manylion pob collfarn a gofnodwyd gan gynnwys collfarnau sydd wedi darfod, a manylion unrhyw rybuddion neu geryddon. Mae hefyd yn golygu lefel fanylach o wirio gyda chofnodion y llu lleol yr heddlu yn ogystal â gwiriadau ar Gyfrifiadur Cenedlaethol yr Heddlu (PNC) a rhestrau adrannau'r llywodraeth o'r rheiny a waherddir yn gyfreithiol rhag gweithio gyda phlant.

Ymgeiswyr sydd wedi byw tramor

Bydd yr arweiniad hwn yn berthnasol os ydych chi wedi byw mewn gwlad arall ar wahân i Brydain Fawr yn y cyfnod o 5 mlynedd cyn i chi wneud eich cais. Mae'r arweiniad hwn yn berthnasol i Ogledd Iwerddon gan nad yw'r Biwro Cofnodion Troseddol yn ymdrin ag ef.

Os ydych chi wedi byw'n barhaus am 6 mis neu ragor mewn gwlad, ar wahân i Brydain Fawr, yn y 5 mlynedd cyn i chi wneud cais, mae'n rhaid i chi gyflwyno tystiolaeth o wiriad troseddol yn ymdrin â'r holl gyfnod y buoch chi'n byw yn y wlad honno, o ffynhonnell swyddogol y gallwn ni ei gwirio.

Os nad yw'r wybodaeth y mae ei hangen arnom ni, neu os nad ydym yn fodlon fod y dystiolaeth yn ddilys, yn gyfredol, yn gyflawn (hynny yw ei bod yn ymdrin â phob gwlad yr ydych wedi byw ynddi am fwy na 6 mis, ac eithrio Prydain Fawr, yn y 5 mlynedd cyn i chi wneud cais), yn rhestru unrhyw droseddau ar eich cofnod ac yn dod o ffynhonnell swyddogol y gellir ei dilysu, yna ni fyddwn ni'n gallu cymeradwyo eich cais.

Byddwn ni'n derbyn copïau gwreiddiol o unrhyw gofnodion neu ddogfennau ac mae'n rhaid iddynt, ble bo'r angen, gael eu cyfieithu gan asiantaeth gyfieithu achrededig, gan lysgenhadaeth neu gan Uchel Gomisiwn.

Mae hyn yn wir i ddinasyddion Prydeinig ac i wladolion tramor.

Os nad ydych chi'n siwr ble i gael y wybodaeth hon dylech chi gysylltu â llysgenhadaeth neu ag uwch gomisiwn y wlad am gyngor.